رمضان كريم

عايز اقول لكل صحابى المدونين كل سنه وانتم طيبين
معلش انا مبقتش اكتب زى الاول عشان ظروف الشغل
اتمنى اسمع عنكم اخبار حلوه ورمضان كريم

مش قادر اركز

انا اسف اوى ياجماعه عشان قلتلكو انى حارجع اكتب ومكتبتش حاجه بس مش عارف مالى انا مش عارف اركز خالص مش عارف اكتب اى حاجه انا تقريبا دماغى فضيت
ادعولى انها ترجع تتملى تانى

تحياتى

كفااااره

ازيكم ياجماعه وحشتونى اوى والله,الحمد لله لسه مخلص امتحانات امبارح وحارجع تانى لمدونتى العزيزه وحبيبى المدونين وكل سنه وانتم طيبين

نظره

ان مرجعية الانسان فى فعل الخير فى دنياه اساسها فطرته التى فطره الله سبحانه وتعالى عليها والتى جاء الدين ليكملها وليجددها حين تبدا فى الانهيار.
نحن كبشر خلقنا وبداخلنا الخير والشر كقوى متكافئه ومتضاده وافعالنا هي نتاج هذا الصراع,وهنا تظهر رحمه الله سبحانه وتعالى فى وجود الدين الذى هو سلاح البشر الذى يدعم الخير فى مواجهه الشر,فهو المدد الدائم للخير فى مواجهه الشر الفطرى بداخلنا.
ان الدين بالنسبه للبشر لهو دستور ونظام لاستقامه الدنيا وصلاحها,من الممكن ان نفعل الخير بدافع من فطرتنا ولكن قد يتحرك الجانب الاخر من الفطره فياتى الدين ليسكته ويخرسه ويقومه ويعيده الى صوابه.
ان البشر بدون دين لهم ارض خصبه صالحه للزراعه لكن تنقصها البذور لتنبت وتثمر,كصفحات بيضاء فارغه تحتاج لقلم يخط بها.
فى اعتقادى الشخصى ان الدين هو السفينه التى بها نعبر بحر الدنيا الى شاطئ الاخره دون ان نغرق فى امواجه.

عدتى

عدتى.. فعاد الافق مجددا فى سمائى
عدتى.. فعادت الالوان الى دنياى
عدتى.. فعاد الفرح الى ايامى
عدتى.. فعاد الصوت الجميل الى اذنى
عدتى.. فعادت الطمائنينه الى نفسى
عدتى.. فعاد الامل الى حياتى
عدتى.. فعاد قلبى ينبض من جديد
عدتى.. فعادت الحياة حياه
عدتى.. فعدت انا

Tag

كنت قاعد باقرا التاج بتاع دودو فى مدونتها كلمتى وفجاه لقيت اسمى من ضمن الخمسه الى وجهتلهم دعوه وبجد فرحت اوى بالتاج ده..ميرسى جدا يا دودو.

ودى قواعد التاج:

1: اذكر 10 اشياء عن نفسك
2: اختر 5 اشخاص تهدى لهم التاج
3: لاتهدى التاج لمن اهداك ايه
4: ابقى عرف الى بعتلك التاج ان التاج نزل وتعالا
شوفه


يامسهل...

1:العبد لله بيحب الضحك والهزار لدرجه ممكن تخليك عايز تخنقنى وترمينى م الشباك.

2:العبد لله بيموت فى حاجه اسمها محمد وشريف واسلام اصحابى و اخواتى الى مجبتهمش امى.

3:العبد لله بيحب التواضع والصراحه مع النفس والعدل.

4:العبد لله مبيحبش الغباء والجهل والكذب والف والدوران والتعالى على الناس.

5:العبد لله اهلاوى صميم وم القلب وبشجع الاهلى حتى وانا نايم.

6:العبد لله مبيعرفش يدى نفسه حقها وثقته فى نفسه ضعيفه اغلب الوقت.

7:العبد لله بيسامح بسرعه ومبيعرفش يشيل من حد مهما عمل فيه.

8:العبد لله كتير بيتكلم من غير مايفكر فى الى بيقوله عشان كده بياخد على دماغه كتير.

9:العبد لله حالته المزاجيه بتتغير بسرعه ولابسط الاسباب.

10:العبد لله بيحب مصر اوى وبيموت فى ترابها
ونفسه يشوفها احلى بلد فى الدنيا.


امرر التاج لمين باه؟...

1:استراحه محمد
2:سمــــراء
3:مقتطفات كنارى
4:اختـــــــــــلاف
5:ابداعات شاب ثائر

بنات بلدى...انا اسف

الايام دى زادت اوى معدلات التحرش بالبنات وتنوعت درجات التحرش,من نظره للفظ لافعال وصلت لمرحله الاغتصاب والعياذ بالله.
الموضوع ده فعلا وصل لمرحله خطيره جدا وبقى زى السوسه الى بتنخر فى جسم مجتمعنا.
معرفش ايه سبب انتشار الظاهره البشعه دى؟!
ناس تقول البطاله,وناس تقول صعوبه الجواز,وناس تقول لبس البنات ومظهرهم,بس انا شايف ان ده برضو مش مبرر كافى للظاهره دى,والله فى بطاله يبقى نسعى وندور على شغل منعدش نبص ونعاكس فى البنات
ولو صعوبه الجواز مظنش انك بمعاكستك لبنت حتكون اشبعت رغبتك من الجواز,ولو لبس البنات ومظهرهم برضو مالناش دعوه يلبسو زى مايلبسو,هما غلط وانتا شايف انهم غلط بس مش من حقنا برضو نعاكسهم على اساس انهم يستاهلو المعاكسه.
واحد حيقولى انتا عاملى فيها فلحوس؟يعنى انتا عمرك مابصيت لبنت؟ولاعمرك عاكست يعنى؟
اقله حصل وبصيت وعاكست بنات ياما,بس بصراحه قرفت من نفسى وبقى بيصعب عليا البنات اوى,باحس انهم ياعينى ماشيين يلفو حوالين نفسهم خايفين من كل حاجه حواليهم,مش ملاحقين معاكسات وكلام وبص من كل حته.
لازم نفتكر ان البنات الى ماشين فى الشارع دول فيهم اختى واختك واخت صاحبك وقريبتك ولو حتى مانعرفهمش فدول بنات بلادنا يعنى عرضنا وشرفنا الى لازم نحافظ عليه.
وبصراحه انا خدت قرار وعهد على نفسى من النهارده انى عمرى ماحدايق او اعاكس بنت تانى والله على مااقول شهيدا.

والى كل بنات بلدى..

"انا اسف"

كفايه تفاهه !!

والله انا مش عارف اكتب واقول ايه,حالنا كعرب دلوقتى بقى يصعب ع الكافر.من فتره كان فى برنامج على الفضائيه اللبنانيه(ربنا ياخدها)اسمه "هزى يانواعم" تخيلو..
هزى يانواعم برنامج هدفه اخراج جيل جديد من العوالم,جيل فاهم ودارس الرقص بمزاج..خلاص معدش فى حاجه نهتم بيها غير الرقص,كل حاجه فى حياتنا بقت زى الفل ومعدش غير الرقص الى مش واخد حقه ومحتاج اهتمام.
انا عن نفسى ماتفرجتش على البرنامج ده بس سمعت ان كان بيبقى فى لجنه مكونه من ناس(افاضل)بيقيمو اداء المتسابقات(ربنا يوفقهم)وبيعلموهم الرقص على اصوله,انا حاتجنن الناس دى مبتكسفش من نفسها معدش فى دم خالص,والمصيبه ان البرنامج بيتذاع من لبنان,مش مكسوفين من حزب الله,الناس الى بتموت عشان هما يعيشو,الناس الى رفعت راس العرب كلهم ورجعتلهم شويه من قيمتهم الى ضاعت.
طب ازاى ربنا يستجيب لدعانا فى تحرير الارض وهوه شايف حالنا بالشكل ده.

تانى برنامج,برنامج ستار اكاديميى,قمه التفاهه و المسخره والانحلال الاخلاقى بدعوه انهم بيخرجولنا مطربين ومغنيين,شباب وبنات وفى مكان واحد وبوس وسلامات واحضان حاجه مش ممكن,انا مش متصور ازاى شخص يسمح لابنه او بنته تكون فى مكان زى ده,فن ايه ونيله ايه الى يسمح بالهبل الى بيعملوه ده,وياريتهم بيطلعولنا حاجه عدله بعد كل ده,شويه شباب سيس الى لابسلى حظاظه والى لابسلى سلسله والى مش عارف رابط ايه على دماغه,ده غير البنات الى لابسين من غير هدوم وسايبنها ع البحرى ومطرينها خالص.والله لو حد من بره شاف البرنامج ده محيصدق ان دول عرب وفيهم ناس مسلمين.

احنا ايه الى جرالنا بالظبط؟ده ابتلاء من ربنا ولا ايه؟!

واخرتــهــــــــــــــا ؟!

امتى باه الواحد حيبقى حر نفسه؟يعمل الى هوه عايزه من غير مايخاف من حد او على حد؟

زمان وانا صغير كنت باحلم يبقى عندى شنب زى الرجاله الكبار,كنت معتقد ان لما يبقى عندى شنب اقدر اعمل الى انا عايزه من غير ماحد يكلمنى ولا يقولى انتا بتعمل ايه..وطلعلى شنب وكبرت واكتشفت ان فى حاجات كتير غير الشنب لازمه عشان اعمل الى انا عايزه ودى بدايه المشوار...

دخلت ثانوى وقالولى لازم تذاكر وتجيب مجموع كبير عشان تدخل كليه كويسه..وكل لما اقلهم انا زهقت يقلولى معلش استحمل كلها سنتين وتعمل الى انتا عايزه..وادينى جبت مجموع كبير ودخلت الكليه جيت اعيش حياتى باه..
انتا بتعمل ايه !!! مش تركز وتذاكر عشان ربنا يكرمك وتتخرج !!!
مش قلتولى ادخل الكليه وخلاص ؟!!
معلش خلص انتا الكليه بس وملكش دعوه..وادينى قربت اخلص والحمد لله بس برضو مش حاعرف اعيش حياتى واعمل الى انا عايزه لانى بعد ماخلص لازم ابدا ادور على شغل واشتغل وبعد ماشتغل امى حتبدا تذن فى ودانى عشان اخطب وتبدا مرحله تانيه من شقه لعفش لجهاز لشبكه لازم ادفع فيها دم قلبى و..واتجوزنا والحمد لله..تمام كده؟!!
لا طبعا,تبدا مرحله جديده من الربطه والخنقه والمسئوليه والحبس الاختيارى وواحده فى رقبتك مسئوله منك وشويه كمان وربنا يكرمك ويرزقك بولى العهد وتزيد مسئولياتك و...

واخرتـهـــــــا؟!

بعد تفكير طويل اكتشفت ان بعد كل الى عملته ولسه حاعمله مفيش راحه حتيجى ومش حاقدر اعيش حياتى او اعمل الى انا عايزه وحافضل داير فى ساقيه الحياه.

الراحه كانت ايام زمان وانا صغير,ايام مكنش ورايا حاجه غير اللعب والاكل والنوم,وحتى ساعتها مكنتش حاسس بالنعمه الى انا فيها وكنت عايز اكبر.

اكيد كلامى محبط,بس للاسف هيه دى الحقيقه.

ملحوظه:محدش يقولى لما نموت

اوووو محلاوووييى !!

بالرغم انى مختلف ومش راضى عن الى بيحصل فى المحله دلوقتى,وكمان مكنتش دى فكرتى عن الاضراب اننا نعد نكسر فى محلات وعربيات الناس ونعيق حركه القطارات والمواصلات العامه ونولع فى فرد كاوتش, فين الاعتصام الهادى من غير زعيق ولاخناق؟,بس برضو انا متضامن مع اهل المحله المصريين فى المقام الاول,انا اتخضيت اوى وانا باشوف لقطات للى بيحصل هناك كانى باتفرج على نقل مباشر من فلسطين مش من المحله,قنابل مسيله للدموع ورصاص مطاطى واصابات ودم وعربيات اسعاف عماله تنقل فى ناس على المستشفيات.
معركه..دلوقتى فى معركه فى المحله وللاسف الطرفين فيها مصريين,بتهيالى اى استمرار للمعركه دى خساره لمصر فى المقام الاول,بتهيالى لو اهل المحله كان نيتهم الاضراب فالموضوع دلوقتى خرج عن حدود الاضراب وبقى حرب شوارع,كلنا عارفين هما بيطالبو بايه ماهم زينا من الشعب الغلبان بس بتهيالى مش دى الطريقه الى ناخد بيها حقوقنا..وربنا يكون فى عون المحله.

بث مباشر..من مخى

وانا قاعد باذاكر(قصدى عامل نفسى باذاكر),لاقيت فجاه النور ضلم و شريط حياتى اشتغل وصورته طالعه على شاشة العرض بتاعة مخى وهاتك يادوران.. ودى بعض المشاهد الى ظهرت قدامى...

المشهد الاول

اول يوم ماما بتصحينى فيه عشان اروح الحضانه كانت فكرانى نايم,متعرفش ان فرحتى انى حاروح الحضانه طيرت النوم من عينى..عملتلى الساندوتشات وقالتلى"اول ماجرس الفسحه يضرب تطلع ساندوتشاتك وتاكلهم..اوعا ترجع بيهم"...

المشهد الثانى

وانا فى رابعه ابتدائى,كنت قاعد فى حوش المدرسه فى الفسحه برضو باكل سندوتشاتى ولقيت "منه" حبى الاول وهيه جايه تطلب منى شويه مايه من الزمزميه بتاعتى عشان ايدها اتعورت وعايزه تغسلها من الدم الى عليها..ياااااااااااااااااه كنت طاير من الفرحه,كنت سعيد لمجرد انى اتكلمت معاها,اى نعم هيه معبرتنيش من بعدها بس مش مهم,شعور السعاده ده مافارقنيش طول اليوم,يمكن مافارقنيش لمده اسبوع...

المشهد الثالث

وانا فى اولى اعدادى,لما الراجل الى كان بابا موصيه يجيب العجله وصل ومعاه العجله بتاعتى,كنت حاطير من الفرحه,اخيرا حيبقالى عجله زى بقيت اصحابى,وسهرت انا وابويا نركب فى العجله لغايه الفجر وياعينى ابويا كان عنده شغل الصبح بس مرضيش ينام غير لما يركبهالى,بتهيالى نظره الفرحه الى كانت فى عينى
كانت اهم عنده من اى شغل...

المشهد الرابع

وانا فى تالته اعدادى,لما شريف صاحبى جالى وقالى"كلمتنى يااحمد..ايمان كلمتنى"..يوه على اليوم ده فرحنا فرح,كانها حبيبتى انا وانا الى كلمتها..كنا غلابه !!!

المشهد الخامس

وانا فى تانيه ثانوى,اتجمعنا انا وصحابى التلاته يوم النتيجه باليل فوق السطح بتاع بيت محمد صاحبى,كانت اعلى دماغ عملنها,دماغ بسيطه مش مكلفه,اربع كبايات شاى وشريط سيلين ديون وعشنا فى عالم الخيال..كان حتة يوم...

المشهد السادس

لما سافرنا انا وصحابى مرسى مطروح ولاول مره نعمل حاجه من الالف للياء لوحدنا خروج واكل ونوم وكل حاجه مع بعض,ولما رحنا شاطئ "عجيبه" وطلعنا فوق حته عاليه وقعدنا نغنى والناس بتشاور علينا وكانهم بيقولو ايه العيال المجانين دى..احلى جنان والله...

المشهد السابع

يوم ماجاتلى فى الكليه وصارحتنى بحبها,تقريبا والله اعلم فى اليوم ده طلعلى جناحين وطرت زى العصافير احساسى فى اليوم ده تخطى كلمه سعاده بمراحل حاجه ماعرفش اعبر عنها بكلمات..برضو كنا لسه غلابه !!!

المشهد الثامن

يوم برضو ماجاتلى فى الكليه وقالتلى احنا مينفعش نكمل مع بعض عشان انا اتخطبت لابن خالتى وباب موافق عليه وانا مقدرش اعارضه,مع ان معدش فى بنات بيتجوزو غصب عنهم..ماعلينا !!!

المشهد التاسع

يوم عيد ميلادى الى فات,لما دخلت عالم الكبار وسبت عالم سمسم بتاعى وبقى عندى 21 سنه والدنيا قالتلى عفوا لقد نفذ رصيدكم من الهبل والجنان بتاع زمان..

ولغايه هنا انقطع الارسال والشاشه ضلمت وظهرت قدامى مذكره الصيدله الصناعيه الى كنت قاعد باذاكر فيها والمفروض اخلصها..يارب تخلص باه !!

ظباط الشرطه وال selective toxicity

برضو من خلال دراستى..اكتشفت ان فى شبه بين ظباط الشرطه الايام دى وبين بعض المضادات الحيويه.

درسنا ان فى حاجه اسمها"selective toxicity"
يعنى المضاد الحيوى بياثر على خلايا البكتريا ومياثرش على خلايا الانسان وكل مازادت الخاصيه دى كان المضاد الحيوى امن فى الاستخدام,طبعا فى مضادات حيويه معندهاش الخاصيه ومبتفرقش مابين البكتريا وجسم الانسان وبتضرب فى ده وبتضرب فى ده,دول باه زى ظباط الشرطه الايام دى,معدوش بيفرقو بين الظالم والمظلوم السارق والمسروق بقو بيضربو فى كله,ده يمكن بقو بيعملو بالعكس وسايبين الحراميه والهبيشه وبتوع الفساد وجايين على الشعب الغلبان الى معدش لاقى رغيف العيش(اه يابلد..كمان رغيف العيش).

الناس دى نسيت انهم موجودين عشان يحمونا مش يضربونا ويبهدلونا,نسيو انهم فى الاول وفى الاخر منا,احنا انتخبناهم عشان يدافعو عنا ويحفظولنا حقوقنا,مش يضربو ولادنا ويعذبوهم,نسيو ان الدوله بتقطع من دخل الموظف الغلبان عشان يدفعولهم مرتباتهم,وبعد كده يمسكو الموظف الغلبان ده فى كمين ويطلعو عين الى جابوه.

طب المضاد الحيوى وبايدنا مانخدوش..لكن دول باه نعمل معاهم ايه؟

الفتو

من شويه كنت باقرا بوست فى مدونه بنوته لاسعه بعنوان "موضوع مستفز"..
كانت بتتكلم عن موقف مر بيها وهيه راكبه الميكروباص ورايحه الكليه وكان السواق مشغل شريط لواحد شيخ بيتكلم عن خروج البنات للتعليم,وازاى كانت مدايقه من هجومه الغير مبرر والمستفز على البنات..
ده خلانى افكر فى موضوع"الفتو",الايام دى كتر الشيوخ وكترت الفتاوى اى حد وكل حد بقى بيتكلم فى الدين,بقى شغلانة الى ملوش شغلانه,حاجه غريبه والله..
الناس دى ازاى بتسمح لنفسها انها تتكلم بغير علم وانها تحلل وتحرم وتطلع فتاوى واحكام,ده الامام الشافعى قال"من قال لااعلم فقد افتى" ,واحنا طبعا منجيش حاجه فى الراجل العظيم ده,دلوقتى تفتح التلفزيون تلاقى فتو,فى الراديو فتو,فى خطبه الجمعه تلاقى فتو,محدش ياخد كلامى بانى ضد رجال الدين وكلامهم,بس يكونو بيتكلمو عن علم,يكون معاه تصريح مثلا من الازهر(للاسف ده كمان بقى بيطلع منه كلام مايعلم بيه الا ربنا)عشان الواحد يكون عنده ثقه فى الى بيسمعه او بيشوفه او بيقراه,عشان ماتبقاش سداح مداح دلوقتى اى حاجه بتتقرى او بتتسمع بتتذاع للعالم كله يعنى اى فتوى بتطلع دى فى وش الاسلام,الغرب كله ماسك للاسلام السكينه والحاجات دى بتجيله على الطبطاب..
الى عايز اقوله ان الواحد بدات ثقته تروح فى اى شيخ طالع يتكلم فى الدين وشويه شويه الناس حتبطل تسمع اى شيخ واى حاجه عن الدين اصلا.
ياريت الناس دى تقف وقفه مع نفسها وتراعى ربنا فينا وفى الى بتقوله.

مدونتى العزيزه

مدونتى العزيزه,

اطلقتى لروحى العنان..نفضتى الاتربه عن عقلى
اضئتى الطريق لفكرى..ايقظتى المارد النائم بداخلى
كتبتى شهاده ميلاد قلمى..بعثت الحياه فى افكارى
لترى النور..كيف كنت من دونك..
كنت عاشق ينتظر حبه..
وانتى حبى..
ادين لك بالكثير..
يا انا..

شويه نضافه

يوم الاربع الى فات مروح انا ومحمد صاحبى ورجعين مالكليه فى عربيته,الجو كان حر فقلتله “تعالا نجيب حاجه نشربها” قالى “فل تعالا”,جبتلى كنزايه وهوه جابله مكس شوكلاته
وبعد ماخلصها قالى”ارميها”,بانزل الازاز وخلاص حارميها…
ايدى ماطوعتنيش !!!
لاقيت الشارع نضيف اوى,نضيف بجد مفيهوش غلطه,قلتله”استنى لما نيجى عند حته فيها سله زباله ولا حاجه,انا ايدى مش مطوعانى..الشارع نضيف اوى ياجدع”..قالى”سبحان الله النضافه بتجبرك تكون نضيف”.
ساعتها فكرت لو كل واحد قبل مايرمى الزباله بتاعته فكر شويه كده وصعب عليه الشارع ونضافه الشارع والراجل الغلبان الى بيكنس الشارع,مش بلدنا كلها حتبقى نضيفه
وعلى راى المثل”القطنه مابتكدبش”

اتركينى

اتركينى..لم اعد ذاك الذى احببتيه
اتركينى..فانا جنين مات فى رحم قلبك
اتركينى..فانا بستان اغرقه غيث حبك
اتركينى..اضئ كهوف قلبى المظلمه
اتركينى..اذيب جليد احساسى
اتركينى..اجاهد ذلك المسخ المدعو انا
اتركينى..واتركى لى ذكرى اعرف بها من كنت

6 ابريل

مستنى يوم 6 ابريل ده بفارغ الصبر,اليوم ده شايف انه حيكون اختبار حقيقى للشعب المصرى,حنقف فعلا ونطالب بحقوقنا,ولا كل واحد حيعمل "عبدو العبيط" ويستنى يشوف الباقى حيعمل ايه,وتصفصف العمليه على مظاهره لحركه "كفايه" فى ميدان التحرير وكل عام وانتم بخير,وترجع ريما لعادتها القديمه,ونرجع تانى نعد نشكى لبعضينا,بس بتهيالى ساعتها محدش حيشتكى ولا حتى حيدايق مهما حصل فينا عشان حنكون عرفنا ان احنا بتوع كلام وبس وساعه الجد كله بيجرى,يارب يخيب ظنى...

حبيبتى..

حاربت كثيرا من اجلك..
حاربت كثيرا من اجل نظره شوق منك..
حاربت كثيرا من اجل همسه حب منك..
حاربت كثيرا من اجل ان ادخل جنه قلبك..
ولكنى احارب نفسى الان لكى اخرج منها..
احارب نفسى التى لازالت تهواكى..
انا مسافر فى الصحراء قتله العطش وانتى مائى..
اشربه فيقتلنى..
ولكن ماحيلتى..فانتى دائى ودوائى..

نظره فى سقوط الشيوعيه

لفتره كبيره من الزمن كنت مقتنع بمبدا الشيوعيه الى هوه لو فى الف واحد وفى واحد منهم معاه الف جنيه والباقى مش معاه حاجه يبقى نوزع الالف جنيه على الالف فرد وكل واحد يبقى معاه جنيه ونبقى كلنا مبسوطين ويسود الحب والسعاده ومحدش يبص على التانى او يحقد عليه(المثال ده حسب فهمى البسيط للشيوعيه),دى طبعا مش دعوه انى اكل حق المجتهد ويجى واحد عوطلى ياخده على الجاهز بس لعيب الكوره او الممثل مثلا بياخد اضعاف اضعاف الى بياخده موظف غلبان مع ان الموظف بيشتغل وبيتعب وبيطلع عين الى جابوه اكتر من لعيب الكوره او الممثل يعنى لو طالبنا بالمساواه هنا منبقاش غلطانين.ارجع لتفكيرى القديم ان بالمبدا ده كل مشاكلنا حتتحل والشعب حيعيش زى السمنه على العسل وميت فل واربعتاشر واقعدت افكر لما الشيوعيه حلوه اوى كده ليه فشلت؟

بس بعد شويه تفكير كده اكتشفت ان فى حاجات مينفعش تتقسم على الشعب مثلا زىالنجاح,السعاده,الحب,التوفيق,الموهبه,يعنى اتنين بيحبو واحده والواحده دى بتحب واحد فيهم مينفعش طبعا تتقسم على اتنين ساعتها حيظهر الحقد والغضب والكره والتمرد تانى فى المجتمع وده طبعا مثال بسيط بس فهمنى ليه فشلت الشيوعيه.

اعدل الشبشب !!

وانا بزاكر وبتمشى فى الاوضه بتاعتى خبطت الشبشب بتاعى وهوه على الارض فتقلب على ضهره فرحت بسرعه عدله لانى متعود من وانا صغير ان حرام الجزمه او الشبشب اوى اى حاجه بتتلبس تكون مش معدوله عشان كده هيه بتبقا فى وش ربنا استغفر الله العظيم,وبعد ماعدلته وقفت ثانيه افكر فى الى انا عملته..
طب مانا بعمل حاجات كتير حرام وبرضه بتبقى فى وش ربنا استغفر الله العظيم,حاجات نزل فيها امر سماوى ان احنا منعملهاش والى منزلش فى امر سماوى الرسول عليه الصلاه والسلام قلنا عليه,ليه انا خفت اوى من حركه الشبشب مع ان حسب علمى لا نزل فيها امر سماوى ولا حديث شريف ومبخفش مثلا لما باكذب ولا ماصليش ولا لما ابص على البنات فى الشارع,خفت من حاجه من اجتهادنا ومخفتش من الى مفروض يتخاف منه بجد,انا لغايه مانا بكتب السطور دى ملقتش تفسير للى انا عملته.

العماره ..والشارع

طول عمرى وانا عايش على فكره ان الدراسه والشغل
عباره عن عماره عاليه وشارع تحتها وانا واقف على سطح العماره وكل مبتقدم فى مراحل الدراسه كل مابابدا
انزل سلالم العماره دى لغايه ماوصل للشارع الى هوه الشغل وانى لو حاولت اشتغل وانا بادرس كانى بالظبط برمى نفسى من دور عالى فى العماره,اى نعم حاوصل للشارع بس حوصل متكسر ومش قادر اتحرك,بس من ناحيه تانيه بقول طب مايمكن على بال مانزل كل السلالم دى يكون نفسى اتقطع والاقى نفسى متكوم على باب العماره ومعتش جوايا طاقه انى اكمل,مقصدش طبعا انى لما اخلص دراسه طاقتى العاديه حتخلص انا قصدى طاقه الابداع..التغيير..الخروج عن المالوف كل ده خايف عليه يخلص او يقل لانها فعلا بدات تقل وبدات احس انى عايز ابقى عادى ماشى مع الماشين وخلاص واعدى على الدنيا كده مرور الكرام,بتهيالى كل واحد اكيد بيفكر زيى كده عايز يسيب بصمته فى الدنيا يكتشف علاج لمرض او يخترع لمبه عمرها اطول,بتهيالى الناس المبدعه الى زى اديسون مثلا واينشتين واحمد زويل وكل العظماء دول لقيو حل للمعادله الصعبه وقدرو يحافظو على طاقه الابداع جواهم وعرفو ازاى يكملو فى الشارع.

من اغرب العادات والمعتقدات

عادات ومعتقدات كتير فى حياتنا بحس ان ملهاش معنى ولا تفسير بس بنعملها وبنرددها كده من غير اى ادراك

زى مثلا لما تاخد برد تشرب شاى بلمون مع ان اللمون اول مبيتعرض لجو على طول فايدته بتروح لان الحمض الى جواه بيتكسر مابالك احنا بنحطه فى شاى مولع..ماعلينا!!

كمان اكل الفسيخ والبصل والبيض المسلوق فى يوم "شم النسيم" اليوم الى مفروض بنحتفل فيه بدخول الربيع والصيف,انا بجد فكرت كتير ملقتش تفسير.

"اقرصيها فى رجلها عشان تحصليها فى جمعتها"
باسمعها كتير بس معرفش ايه صلتها بموضوع الجواز..فكك!!

كمان معرفش ليه كلنا لما بنشوف غراب بنتدايق ونحس بالتشاؤم والنحس,مع ان الغراب ده كان ليه فضل كبير اوى فى تعليم الانسان لما بعته ربنا عشان يعلم قابيل ازى يدارى جثه اخوه هابيل الى كان محتار يعمل فيها
ايه.

كمان طفى التلفزيون لما يكون فى ميتم حتى لو بتتفرج على حاجه مفيهاش اغانى او حاجه تدايق اهل المتوفى
مع انك بتبقى زعلان فعلا بس لازم تقفل التلفزيون عشان يعرفو انك زعلان.

اكيد فى حاجات كتير بنعملها ملهاش تفسير بس ده
الى كان فى دماغى دلوقتى..نفسى باه المنطق يعرف
طريقه لافعالنا.

العلم..الغايه والوسيله

بعد 16 سنه علام,سالت نفسى انتا دلوقتى بقيت جاهز تفيد المجتمع وتفيد نفسك؟..وكانت الاجابه "لا"..
بعد مافقت من صدمه الاجابه حاولت اعرف السبب
ليه انا بعد كل السنين دى وكل التعب ده مقدرش افيد
ولا استفيد,وكان السبب بسيط جدا..
انى مكنتش باتعلم لغرض العلم,انا كنت بتعلم عشان اخد شهاده اشتغل بيها,مش شرط عارف باه ولا مش عارف
احنا على راى عادل امام "بلد بتاعت شهادات صحيح"
يعنى مش المهم تفهم او تستفيد,المهم تعرف ازاى تنجح فى الامتحان,مش مهم تعرف فايده العلم ده فى حياتك
المهم تعدى للسنه الى بعدها.
طب ليه..احنا كده بنضيع مجهودنا وعمرنا ع الفاضى
ليه ميكنش همنا الاول هوا العلم,العلم لغرض العلم
العلم الى بجد الى ينفع يتطبق وابقا شايف فايدته قدام عينى,طبعا جزء كبير من المشكله مشترك فيه الاخوه المسئولين عن التعليم فى مصرنا الحبيبه الى بفضل الله
كسرو القاعده وخلو المستوى العلمى والفكرى للطلبه
يقل مع تقدم سنوات الدراسه عكس كل بلاد العالم مع اننا اكتر شعب مهموم بالتعليم والدروس والمدارس
المنطق يقول ان احنا لازم نكون اكثر شعوب العالم تقدم
بس طبعا ده مش الواقع.
طيب عشان نلخص ونجيب من الاخر..ايه الحل؟
الحل ان احنا نبص للعلم باعتباره الغايه والوسيله
غايه انه يكون فى حد ذاته هدف,وانا بزاكر مثلا
اكون بتعلم لغرض العلم انى اكون عارف فى المجال
ده سواء الطب او الهندسه او التجاره او اى ان كان.
الوسيله انه يكون الشمعه الى بتنورلى طريقى لهدفى الى عايز اوصله..وبس خلاص

رد قلبى..الاصدار المعدل

طبعا كلنا فاكرين الفيلم,"على" ابن الجناينى المجتهد الشاطر الى كافح لغايه مدخل الكليه الحربيه,وكمان ابن الباشا مش فاكر اسمو ايه الى مكنش وراه شغلانه غير انه يجرى بالحصان.دى كانت فكرتنا عن الاغنيا والفقرا
الغنى معاه فلوس لاكن اولاده مش صالحين والفقير مش لاقى ياكل بس ولاده صالحين وناجحين...ده كان زمان
لكن دلوقتى انا شايف ان الوضع ده اتغير ولاد الاغنيا معدوش كده بقوا ناجحين وكويسين وولاد الفقرا بقو ضايعين وفشله(الا من رحم ربى طبعا),انا كلامى هنا مش عن الاغنيا وانهم لازم يكونو بايظين..لا..انا باتكلم
عن الفقرا ليه فقدو رغبه النجاح والوصول للهدف مع انهم احق الناس بالسعى والجهد,معرفش يمكن الدنيا اتغيرت وبقت اصعب,مااظنش ده مبرر,يعنى اكيد الفقير بتاع زمان كان شايف الدنيا صعبه برضو,يبقى اكيد العيب فى الانسان الى رضى بحاله ورفض يتعب ويتغير
ياريت ترجع تانى يا"على"...

حبيبتى

كالنار اطعمها فتحرقنى..

كالشمس انظر اليها فتلهبنى..

كموج هائج ركبته فاغرقنى..

كنور ساطع فى ظلمه حالكه نظرت اليه فاعمانى..

كالسماء بعيده المنال..

الكيس البلاستيك

باحس كتير انى جوا كيس بلاستيك اسود كبير والدنيا شايلاه وماشيه بيه,كل ماحاول اخرج منه الدنيا ترجعنى جواه واعد اصرخ وازعق عشان اخرج بس محدش سامعنى,اسكت وارضى بحالى,لغايه مزهق وارجع احاول اخرج تانى والدنيا تمنعنى تانى,خايف افضل جوه الكيس...

جنه هتلر

متستغربش..خليك معايا واحده واحده وانا افهمك.الراجل ده قوم حروب واحتل بلاد ودمر مدن وشرد ناس كتير وعمل حاجات كتير اوى غلط كل ده عشان ايه؟
فكره..فكره قراها فى كتاب غيرت حياته وقلبت كيانه,اينعم الفكره غلط,بس شوف كم الاصرار والعزيمه الى كانت جواه عشان يحقق فكرته دى.
تخيل باه لو كل واحد فينا عاش عشان فكره او حلم(خير طبعا)وسخر كل امكانياته وطاقاته عشان الحلم ده وكان عنده اصرار انه يوصل لهدفه(بالطرق المشروعه طبعا)تخيل كان الدنيا حيكون شكلها عامل ازاى؟؟
اكيد كانت حتبقى جنه..جنه هتلر

حته القماش..ومكتب التنسيق

اختى الصغيره فى ثانويه عامه(ربنا يتولاها),وهيه نازل رايحه درسها جت فى بالى فكره غريبه..
لما كنا فى ثانويه عامه كنا عاملين زى الى بيجمع فى خيوط ,خيوط كتير كتير وفى اخر السنه عملنا الخيوط دى قماشه ,كل قماشه حجمها على قد ماصحبها جمع من خيوط طول السنه وبعدين خدنا القماشه دى "للترزى" الى هوه مكتب التنسيق,وكل واحد على قد قماشته,الى تطلع بدله والى تطلع قميص والى تطلع بنطلون والى تطلع شورت والى تطلع فوطه وهكذا لغايه مالقماش يخلص,بس قليلين الى فصلهم "الترزى" قصدى مكتب التنسيق الى كان نفسهم فيه..

انا نفسى ابقا حمار

"انتا حمار ياله؟!!"..ده رد اى حد على تصرف غبى او مش مفهوم..بس ليه؟ليه ربطنا بين الغباء والحمار مع ان الحمار ابعد كائن عن الوصف بالغباء,الحمار كائن وفى,حساس,صبور,حمول وزكى..اه زكى بدليل انه لو مشى فى طريق مره بيحفظه ومن غير مايسوقه صاحبه لو مشى فى الطريق ده تانى حيكمل فى الطريق لوحده,بس احنا طبعا بتفكيرنا الغريب بنفسر ده على انه غباء او عدم فهم
واخيرا بما انى نفسى اكون عندى الصفات دى..اقدر اقول "انا نفسى ابقا حمار"

الانسان..والانفلونزا..والمضاد الحيوى

من خلا دراستى(المفروض انى كمان كام شهر حابقا صيدلى ان شاء الله)اكتشفت شبه كبير اوى بين تعامل الانسان مع مشاكله وتعامله مع "الانفلونزا",فيروس "الانفلونزا" ربنا خلقه بحيث انه يبدا حياته وينهيها خلال اسبوع من غير تدخل اى عنصر خارجى,بس طبعا احنا مبنسكتش..
بنعد نبلبع فى "مضاد حيوى" عمال على بطال معتقدين ان هوه حيخلص على "الانفلونزا",بس ده مبيحصلش احنا كل الى بنعمله ان احنا بندمر نفسنا بنفسنا وكمان بندى البكتريا والفطريات واى مايكرو اورجانزم تانيه مقاومه ضد "المضاد الحيوى" ده فلما نعوزع بجد باه فعلا ميديش اى تاثير,ده بالظبط بيعمله الانسان فى طريقه تعامله مع المشاكل,يسيب المشكله الاساسيه وحلها ويعد يدور على حاجه ينسى بيها المشكله وهنا تبدا مرحله تدمير النفس من تدخين لمخدرات لادمان لفقد الهدف بحجه انها معدتش جايبه همها,بس الفرق هنا ان "الانفلونزا" هنا بتقضى على نفسها,بس طبعا المشكله مبتحلش نفسها وبالتالى احنا بنضر من المشكله ومن طريقه تعاملنا معاها الى هيه "المضاد الحيوى"...

بيادن فى مالطه

خطيب جامعنا..ياه على الراجل ده اد ايه عايز يغيرنا,اد ايه صعبان عليه الحال الى وصلنالو,اد ايه حيتجنن من حال الناس الايام دى واد ايه كوميدى فى خطبته لدرجه بتخلى الى فى الجامع عنيهم تدمع من كتر الضحك,بس ده الى بيسموه شرالبليه مايضحك,وطبعا معظم خطبه بتتكلم عن الشباب والضياع الىوصلوله وانهم طول الوقت يامتخدرين(بيشربو بنجو فى الجنايان) اما بيكلمو فى بنات على المحمول(الموبايل يعنى)ياما بيروحو (محلات النت) عشان يتفرجو على(السكس),كل ده بيقوله تقريبا كل جمعه بيجيها الجامع الى بيدخله الشباب فى اخر دقيقه فى الخطبه ساعتها بابقى نفسى اقله...

ياعم الشيخ..انتا بتادن فى مالطه